Արցախի լիակատար հայաթափումից և Հայաստանում բնակություն հաստատելուց 1 տարի անց բազմաթիվ արցախցիներ հրաժարվում են ՀՀ քաղաքացիություն ստանալ։ Պատճառները տարբեր են՝ հայրենիք վերադառնալու ակնկալիքից, մինչև տարբեր սոցիալական աջակցություններից օգտվելուց զրկվելը։
Այս ընթացքում շահարկվում է նաև այն հանգամանքը, որ Արցախից բռնի տեղահնված պատանիները ՀՀ քաղաքացիություն ստանալու և 18 տարին լրանալու դեպքում պարտադիր ժամկետային ծառայություն պետք է անցնեն ՀՀ զինված ուժերում։
Oragir.News-ը գրավոր հարցում է ուղարկել Պաշտպանության նախարարություն՝ պարզելու, թե Արցախից բռնի տեղահանված քանի՞ քաղաքացի է 18 տարին լրանալուց հետո որպես ժամկետային զինծառայող ծառայության անցել ՀՀ զինված ուժերում։
«Հայտնում ենք, որ ՀՀ զինված ուժերում պարտադիր կամ պայմանագրային զինվորական ծառայության կարող են անցնել միայն ՀՀ քաղաքացիություն ունեցող անձինք»,- նշված է ՊՆ-ի պատասխանում։
Փաստացի ՊՆ-ն չի պատասխանել հարցին՝ արդյոք այս ընթացքում արցախից բռնի տեղահանվածներ ծառայության անցե՞լ են Զինված ուժերում, թե՞ ոչ։ Եթե այո, ապա քանիսը։
© ORAGIR.NEWS https://oragir.news/hy/material/2024/10/22/133529?
