Կալիֆորնիայում անտառային հրդեհների զոհերի թիվը հասել է հինգի, հայտնում են իշխանությունները:
«Այսօր ավելի վաղ հայտնել էինք երկու զոհերի մասին։ Ցավոք սրտի, զոհերի թիվը հասել է հինգի»,- ասել է Լոս Անջելեսի շրջանի շերիֆ Ռոբերտ Լունան։
Նրա խոսքով՝ հրդեհները դեռ տեղայնացված չեն, զոհերի թիվը կարող է աճել։ Իրավիճակը սրում են ուժեղ քամին և չոր եղանակը։
Իշխանությունները նշում են, որ Լոս Անջելեսի տարածքում շարունակում են մոլեգնել հինգ անտառային հրդեհ միաժամանակ, 150 հազար մարդ ապրում է տարհանման գոտիներում:
Սանտա Մոնիկայի և Մալիբուի միջև Խաղաղ օվկիանոսի Պալիսադես տարածաշրջանում բռնկված է ամենամեծ հրդեհը՝ ներառելով ավելի քան 60 քառակուսի կիլոմետր: Հրդեհը ոչնչացրել է այնտեղ գտնվող առնվազն 1000 շինություն, ասել է Լոս Անջելեսի շրջանի հրշեջների ղեկավար Էնթոնի Մարոնեն։
Լոս Անջելեսի արևմտյան շրջանի Մալիբուի հավածում շատ հայտնի աստղերի տներ են գտնվում:
Մալիբուի լողափում գտնվող տները գերթանկարժեք առանձնատնե են, դրանցից մեկն, օրինակ, ամբողջությամբ այրվել է, այ պատկանում է դերասանուհի և երգչուհի Փերիս Հիլթոնին։ Ավելի ուշ դա հաստատել է ինքը՝ Հիլթոնը։
Հիլթոնի առաձնտունը
TMZ-ը հայտնում է նաև այլ հայտնի Լոս Անջելեսի բնակիչների մասին, որոնց տները տուժել են հրդեհներից։
Լոս Անջելեսի Պալիսադես շրջանում բռնկված հրդեհը ստիպել է տարհանել 30 հազար մարդու։ Նրանց թվում է եղել Օրլի Իսրայելը, որը լքել է շքեղ 5 միլիոն դոլար արժողությամբ տունը:
30-ամյա Իսրայելը ստիպված է եղել լքել իր տունը Խաղաղ օվկիանոսի ափին, երբ նա և իր ընկեր Թաներ Չարլզը փորձել են այն պաշտպանել առաջացող անտառային հրդեհից, գրում է Daily Mail-ը: Տարածքի շրջակայքում նրանք հսկա քարեր են տեղադրել, սակայն երեք ժամ անց տան բակը բռնկվել է: Արդյունքում՝ տունը կես ժամվա ընթացքում այրվել է ամբողջությամբ:
Հունվարի 8-ի երեկոյան կայացած մամուլի ասուլիսում իշխանությունները հայտնել են, որ հերթական հրդեհն է բռնկվել Հոլիվուդ Հիլզ շրջանում՝ Լոս Անջելեսի ամենահայտնի թաղամասերից մեկում, որտեղ գտնվում է Հոլիվուդի հայտնի նշանը:
Տարհանվածների թվում եղել են նաև այլ հայտնիներ։ Դերասաններ Մարկ Հեմիլը, Յուջին Լևին և Ջեյմս Վուդը նույնպես շտապ լքել են իրենց տները։ Վուդը նույնիսկ կիսվել է իր բնակավայրից ընդամենը երկու թաղամաս հեռավորության վրա գտնվող այրվող տան տեսանյութով:
ԱՄՆ փոխնախագահ Քամալա Հարրիսի նստավայրը ներառվել է տարհանման գոտում։
Հրդեհը ավերել է ռեալիթի հեռուստաաստղ Սպենսեր Պրատի և նրա կնոջ՝ Հայդի Մոնթագի տունը։
Ֆորմուլա 1-ի ժառանգորդ Պետրա Էքլսթոունը և նրա ամուսին Սեմ Փալմերը նույնպես տարհանվել են երեխաների հետ։ Դերասան Սթիվ Գուտենբերգն օգնել է հրշեջներին՝ մեքենաների շարժման միջոցով տեղ բացելով նրանց մեքենաների համար։
ԱՄՆ նախագահ Ջո Բայդենը մեծ աղետ է հայտարարել Կալիֆորնիայում և հրամայել է դաշնային օգնություն տրամադրել՝ լրացնելու տեղական ջանքերը՝ անտառային հրդեհներից տուժած տարածքները վերականգնելու համար:
«Նախագահի հրամանի համաձայն՝ դաշնային ֆինանսավորումը հասանելի է դառնում Լոս Անջելեսի շրջանի բնակիչներին: Աջակցությունը կարող է ներառել դրամաշնորհներ բնակարանների և տների ժամանակավոր վերանորոգման համար, ներելի վարկեր՝ չապահովագրված գույքի դեպքում կորուստները ծածկելու համար և այլ ծրագրեր, որոնք նախատեսված են մարդկանց և բիզնեսի սեփականատերերին օգնելու՝ վերականգնել բնական աղետի հետևանքները»,- ասվում է Սպիտակ տան հայտարարության մեջ:
Բայդենը նաև հետաձգել է առաջիկա այցը Իտալիա՝ կենտրոնանալու հրդեհաշիջման աշխատանքների վրա:
Կալիֆորնիայի մի հատվածը, որն ամբողջ աշխարհում հայտնի է իր սերֆինգի վայրերով, աստղային առնձնատներով ու տներով, ծովափնյա հմայիչ կյանքով, ամբողջությամբ ավերվել է: Վտանգի գոտում է նաև Քարդաշյանների՝ Մալիբուում գտնվող առանձնատունը:
Ներկայիս հրդեհներն արդեն համարվում են ամենաթանկը Լոս Անջելեսի պատմության մեջ։
Լոս Անջելեսի բնակիչները շոկի մեջ են՝ տեսնելով, թե որքանով են վնասվել ամենահայտնի տեսարժան վայրերը: Բոլոր բնակիչները նախազգուշացնող հաղորդագրություններ են ստացել, որում կոչ է արվում պատրաստ լինել ցանկացած պահի տարհանման՝ պատրաստել փաստաթղթերն ու առաջին անհրաժեշտության իրերով պայուսակները:
