ԱՄՆ իշխանությունները պետք է դադարեցնեն «Ամերիկայի Ձայն» ռադիոկայանի և «Ազատ Եվրոպա/Ազատություն» մեդիա կորպորացիայի աշխատանքը: Դրանում վստահություն է հայտնել Իլոն Մասկը, որը ղեկավարում է ԱՄՆ կառավարության արդյունավետության գործակալությունը։
«Այո, փակեք դրանք», — գրել է Մասկը «X»-ում՝ մեկնաբանելով խնդրո առարկա լրատվամիջոցների վերաբերյալ հաղորդագրությունները։
«Եվրոպան այժմ ազատ է (բացառությամբ խեղդող բյուրոկրատիայի)»,- հավելել է Մասկը։ Դրանց այլեւս ոչ ոք չի լսում»,- շեշտել է նա՝ խոսելով ռադիոկայանի և մեդիա կորպորացիայի մասին։
«Սրանք պարզապես խելագար ձախ արմատականներ են, ովքեր խոսում են իրենց հետ և այրում տարեկան 1 միլիարդ դոլար ամերիկյան հարկատուների փողերը»,- եզրափակել է նա։
Այսպես Մասկը մեկնաբանել է ԱՄՆ նախագահ Դոնալդ Թրամփի հատուկ բանագնաց Ռիչարդ Գրենելի ուղերձները, ով ավելի վաղ X-ում գրել էր. «Ազատ Եվրոպան» և «Ամերիկայի ձայնը» լրատվամիջոցներ են, որոնց համար վճարում են ամերիկացի հարկատուները։ Սրանք պետական լրատվամիջոցներ են։ Այնտեղ աշխատում են բազմաթիվ ծայրահեղ ձախ ակտիվիստների: Ես տասնամյակներ շարունակ աշխատել եմ այս լրագրողների հետ։ Դա անցյալում է։ Մեզ պետք չեն պետական միջոցներով ֆինանսավորվող լրատվամիջոցներ»,- ընդգծել էր Գրենելը։
Թրամփի վարչակազմը նախկինում մի շարք միջոցներ է ձեռնարկել՝ ուղղված դաշնային բյուջեի ծախսերի կրճատմանը։ Հունվարի վերջին դադարեցվել է արտաքին օգնության գրեթե բոլոր ծրագրերի ֆինանսավորումը։ Հետագայում նման ծրագրերի զգալի մասը վերսկսվել է։
