Երեկ՝ նոյեմբերի 7-ին, ողբերգական դեպք է տեղի ունեցել Արմավիրի մարզում: Ժամը 15:30-ի սահմաններում Արմավիրի մարզի բնակիչ 27-ամյա Արման Ա.-ն իր վարած Toyota մակնիշի ավտոմեքենայով Էջմիածին քաղաքի Ա. Մանուկյան թաղամասում վրաերթի է ենթարկել հետիոտն 6-ամյա Միքայել Պ.-ին:
Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, իր ավտոմեքենայով վրաերթի ենթարկվածին տեղափոխել է «Վաղարշապատ» բժշկական կենտրոն:
Մինչ դեպքի վայրում աշխատում էր քննչական խումբը, հիվանդանոցից ահազանգ է ստացվել ոստիկանության Վաղարշապատի բաժին, որ վրաերթի ենթարկված երեխան, գիտակցության չգալով, մահացել է:
Դեպքի փաստով Վաղարշապատի քննչական բաժնում նախաձեռնվել է քրեական վարույթ:
Քննիչի հանձնարարականով ավտոմեքենան տեղափոխվել է ոստիկանության Վաղարշապատի բաժնի պահպանվող հատուկ տարածք:
