Շաուրմայի հիմնական վտանգն այն է, որ աղացած միսը, մայոնեզի սոուսը և այս ուտեստի մեջ ներառված բանջարեղենը կարող են աղտոտված լինել աղիքային ինֆեկցիաների պատճառ հանդիսացող բակտերիաներով՝ դիզենտերիա, սալմոնելոզ, կամպիլոբակտերիոզ, երսինիոզ: Այս մասին «Իզվեստիա»-ին պատմել է գաստրոէնտերոլոգ Եկատերինա Քաշուխը։
Ըստ բժշկի՝ կա նաև սննդային հիվանդությունների վտանգ, երբ բակտերիաներն իրենք մահանում են, բայց իրենց հետևում թողնում են բազմաթիվ տոքսիններ։
Նա նշել է, որ աղիքային ծանր վարակի հավանականությունն ավելի մեծ է թուլացած իմունային համակարգ ունեցող մարդկանց մոտ, ինչպիսիք են՝ իմունային համակարգը ճնշող դեղեր ընդունողները, ինչպես նաև ՄԻԱՎ-ով ապրողները:
«Սակայն, ըստ էության, ոչ ոք ապահովագրված չէ։ Արտաքուստ լիովին առողջ մարդը կարող է լուրջ վնասներ կրել շաուրմա ուտելուց հետո։ Դա հնարավոր է, եթե նա արդեն ուներ չախտորոշված քրոնիկական հիվանդություններ, որոնք առանց ախտանիշների էին: Կամ եթե պարզվում է, որ բակտերիալ բեռը չափազանց մեծ է, և օրգանիզմը պարզապես չի կարողանում դիմակայել դրան»,- ասել է բժիշկը։
Ինչպես ընդգծել է «Իզվեստիա»-ի զրուցակիցը, շաուրմայի ամենավտանգավոր բաղադրիչը միսն է։ Եթե պահպանման և պատրաստման տեխնոլոգիան խախտվում է, դա կարող է առաջացնել բակտերիալ և վիրուսային աղիքային վարակներ։
«Ռոտավիրուսային և էնտերովիրուսային վարակներ առաջացնող պաթոգենները կարող են մնալ վատ լվացված բանջարեղենի մակերեսին։ Նաև վատ մշակված մթերքների պատճառով կարող եք վարակվել հեպատիտ A վիրուսով (լյարդի բորբոքային հիվանդություն)»,- ասել է նա։
