ՀՀ էկոնոմիկայի նախարար Վահան Քերոբյանը Ճապոնիա կատարած այցի շրջանակում նոյեմբերի 13-ին Ճապոնիայի արտաքին առևտրի կազմակերպության (JETRO) կենտրոնական գրասենյակում հանդիպում է ունեցել JETRO-ի նախագահ և գլխավոր գործադիր տնօրեն Նորիհիկո Իշիգուրոյի հետ:
Այս մասին հայտնում են նախարարությունից:
Հանդիպմանը ներկա են եղել Ճապոնիայում ՀՀ արտակարգ և լիազոր դեսպան Արեգ Հովհաննիսյանը և ՀՀ էկոնոմիկայի նախարարի տեղակալ Նարեկ Տերյանը:
Հանդիպմանը կողմները քննարկել են հայ-ճապոնական տնտեսական հարաբերությունների զարգացմանն ու առևտրաշրջանառության ծավալների մեծացմանն ուղղված գործնական հարցեր:
Վահան Քերոբյանը ներկայացրել է Հայաստանի ներդրումային գրավչությունը, գործարարությամբ զբաղվելու դյուրին պայմանները և օրեցօր ավելի ազատականացող օրենսդրությունը, և ընդգծել այս ամենի մասին ճապոնացի գործարարների իրազեկվածությունը բարձրացնելու անհրաժեշտությունը:
Նորիհիկո Իշիգուրոն պատրաստակամություն է հայտնել այս հարցում ամենայն աջակցություն ցուցաբերել հայկական կողմին, ինչպես նաև օժանդակել Հայաստանին համատեղ գործարար միջոցառումներ իրականացնելու հարցում:
Կողմերն անդրադարձել են հայ-ճապոնական առևտրատնտեսական հարաբերություններին առնչվող մի շարք հարցերի և պայմանավորվել հետամուտ լինել ձեռքբերված պայմանավորվածությունների կատարման ընթացքին:
