«Մուրացան» զինվորական հոսպիտալի մոտ, որտեղ բուժզննում են անցնելու Բաքվի գերությունից վերադարձածհայ զինծառայողները, հայտարարվեց, որ յուրաքանչյուր ընտանիքից մեկական հոգու հնարավորություն է տրվում այցելել, տեսակցել զինծառայողներին:
Գերեվարված տղաների հարազատները (մեծամասամբ՝ ծնողները) ներկայացրեցին անձնագրեր, ցուցակագրվեցին և հնարավորություն ստացան մուտք գործել հոսպիտալի տարածք, որտեղ բուժզննման ավարտից հետո կտեսակցեն իրենց որդիներին:
Հայաստան վերադարձածների մեծ մասը Խծաբերդի և Հին Թաղերի հատվածում հիմնականում գերեվարված շիրակցի տղաներն են:
Ինչպես հայտնել ենք, 2020-2023 թթ. գերեվարված ՀՀ 31 զինծառայողները և սեպտեմբերին ԼՂ-ում գերեվարված 1 զինծառայողն արդեն գտնվում են Հայաստանի Հանրապետությունում:
Ավելի վաղ հայտնել էինք, որ Ղազախ-Իջևան սահմանին տեղի է ունեցել Հայաստանի և Ադրբեջանի միջև գերիների փոխանակման գործընթացը:
Հայաստանի Հանրապետության վարչապետի աշխատակազմը և Ադրբեջանի Հանրապետության նախագահի վարչակազմը 6 օր առաջ համատեղ հայտարարություն էին տարածել, համաձայն որի՝ երկու պետությունները վերահաստատում են ինքնիշխանության և տարածքային ամբողջականության սկզբունքների հարգման հիման վրա հարաբերությունները կարգավորելու և խաղաղության պայմանագրի կնքմանը հասնելու իրենց մտադրությունը։
Ըստ հայտարարության՝ Ադրբեջանն ազատ է արձակում 32 հայ, Հայաստանի Հանրապետությունը՝ 2 ադրբեջանցի գերիների:
