Արցախցի իրավապաշտպան Կարեն Օհանջանյանը երկար տարիներ զբաղվում էր իրավապաշտպան, հասարակական գործունեությամբ, մամուլում եւ տարբեր հարթակներում հանդես էր գալիս Արցախի հարցի, Հայաստանի քաղաքականության վերաբերյալ հստակ դիրքորոշումներով:
Ինչո?վ է նա զբաղվում Հայաստան տեղափոխվելուց հետո:
Lragrogh.com-ի հետ զրույցում Կարեն Օհանջանյանը նշեց, որ դեռեւս ՀՀ քաղաքացիություն չի ստացել:
«Անտանելի հոգեկան ցավ եմ ապրում Լեռնային Ղարաբաղի եւ նրա քաղաքացիների նկատմամբ կատարված դավաճանության պատճառով: Չեմ հուսահատվում, փորձում եմ համագործակցել միջազգային, միջկառավարական կառույցների հետ, որպեսզի նրանց ուշադրությունը հրավիրեմ Արցախի քաղաքացիների անվտանգության խնդրի վրա, որոնք թողել են իրենց պատմական հայրենիքը` առանց լավ ապագայի հույսի: Այդ նպատակով հիմնել եմ «Լեռնային Ղարաբաղի ազատագրման կազմակերպություն»-ը, որի նպատակն է բացառապես դիվանագիտական ճանապարհով նպաստել Արցախի քաղաքացիների վերադարձին Ղարաբաղ, հաշվի առնելով ժամանակակից իրողությունները` միջազգային հանրության աջակցությամբ փոխել Լեռնային Ղարաբաղի գոյություն ունեցող կարգավիճակը: Սա շատ բարդ աշխատանք է, բայց մենք պետք է ներգրավենք մասնագետների եւ աշխատենք այդ նպատակների իրականացման ուղղությամբ, ինչը եւ անում եմ: Համոզված եմ, որ Ղարաբաղի հարցը փակված չէ, քանի որ ԼՂՀ կոնցեպտը գաղափար է, իսկ գաղափարը չի կարելի ոչնչացնել: Ուստիեւ ժամանակի ընթացքում մենք կհասնենք ԼՂՀ-ի ճանաչման անհրաժեշտության գիտակցմանը: Թեպետ միջազգային իրավունքը չի գործում, սակայն աշխարհը փոխվում է, եւ մենք, հարմարվելով ժամանակակից պայմաններին, պետք է աջակցենք ԼՂՀ ճանաչմանը: Վստահ եմ, որ վաղ թե ուշ մենք հաղթելու ենք: Եվ այդ մասին պետք է իմանան բոլորը` թե’ հակառակորդները, թե’ բարեկամները »,- հավաստիացրեց Կարեն Օհանջանյանը:
