«Ադրբեջանի և Հայաստանի միջև խաղաղություն և միջպետական հարաբերություններ հաստատող պայմանագրի ստորագրումը, եթե ֆորս-մաժոր տեղի չունենա, տեղի կունենա 2024 թվականի սկզբին։ Այս հարցում բոլոր խոչընդոտները հիմնականում վերացվել են»։
Այս մասին ֆեյսբուքյան իր էջում գրել է ադրբեջանցի քաղաքագետ, Միլլի Մեջլիսի պատգամավոր Ռասիմ Մուսաբեկովը։
«Փաշինյանի կառավարության ցանկությունը՝ ներգրավել որևէ երաշխավորի, այնքան էլ անհրաժեշտ չի թվում. Ի վերջո, փաստաթուղթը շրջանակային փաստաթուղթ է, այն արձանագրում է կողմերի պատրաստակամությունը՝ կառուցելու հարաբերություններ միջազգային իրավունքի հիմնարար նորմերին համապատասխան և չի պարունակում որևէ դրույթ, որը լրացուցիչ երաշխիքներ է պահանջում մեծ տերություններից։ Համաձայնագիրը վավերացման ընթացակարգի ավարտից հետո ներկայացվում է ՄԱԿ և գրանցվում այնտեղ։ Սա բավարար է։
Պայմանագիրը կարող են ստորագրել նաեւ արտգործնախարարները, օրինակ՝ Թբիլիսիում։ Ակնհայտ է, որ սա Բաքվի համար նախընտրելի տարբերակ է, որն ամբողջությամբ չի գոհացնում բրյուսելյան հարթակին նախապատվություն տվող Երեւանին։ Սակայն պետք է հաշվի առնել նաև Մոսկվայի հավակնությունները, որի արտաքին քաղաքականության գերատեսչությունը հրապարակավ հիշեցրեց Ռուսաստանի դերը 2020 թվականի նոյեմբերի Եռակողմ հայտարարության ընդունման և իրականացման գործում, ինչի արդյունքում ավարտվեց ղարաբաղյան երկրորդ պատերազմը»,- գրել է պատգամավորը։
Միևնույն ժամանակ, նրա խոսքով, Ռուսաստանը գիտակցում է, որ հակամարտության միանձնյա մեղմացման ժամանակն անցել է և խորհրդակցություններ է անցկացնում Իրանի և Թուրքիայի հետ՝ տարածաշրջանային հարթակում Ադրբեջանի և Հայաստանի միջև խաղաղության պայմանագրի կնքումը կազմակերպելու համար։
Ըստ Մուսաբեկովի, Մոսկվան, որպես խաղաղության պայմանագրի հնարավոր ստորագրման վայր, Երևանի համար անընդունելի է թվում։
«Իր հերթին, Թեհրանն անընդունելի է Ադրբեջանի համար, քանի որ մենք նույնիսկ չենք վերականգնել այնտեղ մեր դեսպանատան աշխատանքը։ Առաջարկ կանեմ Երևանի և Անկարայի միջև համաձայնագրի հաժամանակյա ստորագրման հնարավորության մասին, ըստ որի՝ կսկսվի հայտնի Ցյուրիխյան արձանագրությունների կամ Հայաստանի և Թուրքիայի միջև դիվանագիտական հարաբերությունների հաստատման և տրանսպորտային հաղորդակցությունների բացման մասին արձանագրության վավերացման գործընթացը։ Այս դեպքում ԱԳՆ ղեկավարների ստորագրման վայրը կարող է լինել Ստամբուլը։ Տարածաշրջանի երկրների նախագահները կարող էին ներկա գտնվել ինչպես անմիջականորեն, այնպես էլ տեսաֆորմատով։ Ավելին, ՌԴ նախագահ Վլադիմիր Պուտինը հայտարարել է 2024 թվականին Թուրքիա իր այցի մասին։ Ինչո՞ւ չհամատեղել այս ամենը»,- եզրափակել է նա։
