Սիլիկոնյան հովտի միլիարդատերերը, որոնք կանգնած են Հյուսիսային Կալիֆոռնիայում 800 միլիոն դոլար արժողությամբ հողերի գաղտնի գնման հետևում, վերջապես բացահայտել են նոր կանաչ քաղաք ստեղծելու՝ իրենց ծրագրերի որոշ մանրամասներ, գրում է Associated Press-ը։
Տարիներ շարունակ ուշադրությունից խուսափելուց հետո, Goldman Sachs-ի նախկին թրեյդեր Յան Սրամեկը, ով գլխավորում է նախագիծը, հինգշաբթի օրը բացեց California Forever նախագծին նվիրված կայք: Կայքը նկարագրում է նախագիծը որպես «նոր համայնք, լավ վարձատրվող տեղական աշխատատեղեր, արևային ֆերմաներ և բաց տարածք ստեղծելու հնարավորություն» Սոլանոյում՝ Սան Ֆրանցիսկոյի և Սակրամենտոյի միջև գտնվող գյուղական շրջան, որտեղ այժմ 450,000 մարդ է բնակվում։
Նա նաև սկսեց հանդիպել տարածքը ներկայացնող առանցքային քաղաքական գործիչների հետ, ովքեր մի քանի տարի անհաջող կերպով փորձում էին պարզել, թե ով է կանգնած առեղծվածային Flannery Associates ընկերության հետևում, որը հսկայական հողատարածքներ է գնում, ինչը դրան դարձնում է տարածքի ամենամեծ հողատերը:
Նախագծին աջակցում են Սիլիկոնյան հովտի մի շարք ձեռնարկատերեր և վենչուրային կապիտալիստներ, այդ թվում՝ բարերար Լորեն Փաուել Ջոբսը, LinkedIn-ի համահիմնադիր Ռիդ Հոֆմանը և վենչուրային կապիտալիստ Մարկ Անդրեսսենը: Առաջին անգամ խմբի ներդրողների և ծրագրերի մասին հայտնել է The New York Times-ը։
California Forever-ը՝ Flannery-ի մայր ընկերությունը, գնել է ավելի քան 202 քառ. կմ հողատարածք Սոլանո շրջանում՝ հիմնականում շրջանի հարավ-արևելյան մասում՝ Ֆեյրֆիլդից մինչև Ռիո Վիստա ձգվող տարածքներով:
Սակայն, գյուղատնտեսական հողերի վրա քաղաք հիշեցնող որևէ բան կառուցելու համար խումբը պետք է համոզի Սոլանո շրջանի ընտրողներին հավանություն տալ 1984 թվականից գործող նախաձեռնությանը, որը թույլ է տալիս հողը քաղաքային նպատակով օգտագործել։ Տեղական և դաշնային պաշտոնյաները դեռևս հարցեր ունեն խմբի մտադրությունների վերաբերյալ:
Երկու կոնգրեսականներ, ովքեր տարիներ շարունակ փորձում էին պարզել, թե արդյոք օտար հակառակորդներ կամ ներդրողներ են կանգնած ԱՄՆ ռազմաօդային ուժերի բազայի շուրջն ազգային անվտանգության և տեղական տնտեսության համար կենսական նշանակություն ունեցող հող գնելու հետևում, զայրացած են, որ Flannery-ն թաքցրել է իր անձը: Ընկերության կայքում նշվում է, որ իր միջոցների 97%-ը ստացվում է ԱՄՆ ներդրողներից, մնացածը՝ Մեծ Բրիտանիայի և Իռլանդիայի ներդրողներից:
«ՀԴԲ-ն, գանձապետարանը, բոլորը փորձում են պարզել, թե ովքեր են այդ մարդիկ», — ասաց ԱՄՆ ներկայացուցիչ Մայք Թոմսոնը, ով ներկայացնում է շրջանի մեծ մասը, այս շաբաթ Սրամեկի հետ հանդիպումից հետո. «Նրանց գաղտնիությունը ստեղծեց շատ խնդիրներ, շատ ժամանակ և շատ ծախսեր»:
