«Անցած չորեքշաբթի մանդատս վայր դնելու դիմում եմ գրել, գործընթացը 7 օր է տեղի ունենալու, եթե թղթաբանությունը հասցնենք, ապա մարզպետի նշանակումը, ամենայն հավանականությամբ, տեղի կունենա առաջիկա կառավարության նիստի:
Այս մասին լրագրողների հետ զրույցում ասել է ախկին պատգամավոր Դավիթ Առուշանյանը՝ անդրադառնալով իր` Շիրակի մարզպետի պաշտոնում նշանակվելուն։
Նա հավելել է, որ Շիրակի արդեն նախկին մարզպետ Մուշեղ Մուրադյանն աշխատանքից ազատվել է սեփական դիմումի համաձայն.
«Վարչապետը շնորհակալություն է հայտնել պարոն Մուրադյանին իր կատարած աշխատանքի համար։ Թե ինչից է դժգոհ եղել, ինչ խնդիրներ կային` չեմ կարող ասել»,- հավելել է նա:
Հիշեցնենք՝ Կառավարության՝ դեկտեմբերի 12-ի նիստում հայտնի դարձավ, որ Շիրակի մարզպետ Մուշեղ Մուրադյանն աշխատանքից ազատման դիմում է գրել:
Մինչ այդ էլ ԱԺ «Քաղաքացիական պայմանագիր» խմբակցության պատգամավոր Դավիթ Առուշանյանը վայր էր դրել պատգամավորական մանդատը։
Վարչապետ Նիկոլ Փաշինյանը դեկտեմբերի 13-ին, ընդունելով Գյումրիում անցկացված փրայմերիզի մասնակիցներին, հայտնել էր, որ որոշել է Կառավարությանը ներկայացնել Դավիթ Առուշանյանի թեկնածությունը՝ որպես Շիրակի մարզպետ:
