2008 թվականի մարտի 1-ի ողբերգական իրադարձություններից տասնյոթ տարի անց խորհրդարանում հրավիրվել էին լսումներ: Մարտի 1-ի իրադարձությունների մասին բավարար տեղեկատվության տիրապետող քաղաքական գործիչները, փորձագետները, զոհերի հարազատները հարցեր ուղղեցին իրավապահ համակարգի պաշտոնյաներին սպանությունն իրագործած, դրանց ուղղակի կամ անուղղակի մասնակցած անձանց վերաբերյալ:
Մարտի 1-ին զոհված Տիգրան Խաչատրյանի մայրը` Ալլա Հովհաննիսյանը, որն այժմ ապրում է Բելգիայում Lragrogh.com-ի հետ զրույցում նշեց, որ ինքը հետեւում է խորհրդարանում հրավիրված լսումներին: Նա Մարտի 1-ի զոհերի մյուս հարազատների հետ անցյալ ամռանը հանդիպել է Երեւանում, փաստաբան Տիգրան Եգորյանի գրասենյակում:
«Այսօր ամբողջությամբ հետեւել եմ լսումներին, հնչում էին կոնկրետ, դիպուկ հարցեր եւ պահանջներ, որոնց համակարծիք եմ, սակայն պատասխանները շատ լղոզված էին: Քլոյանի` «Չերյոմուխա 7»-ից կրակելու մասին հարցադրմանը Հակակոռուպցիոն կոմիտեի նախագահ Արթուր Նահապետյանը պատասխանում է, որ տասնյոթ տարի անց բավարար ապացույցներ չունեն: Փաստ է, որ հեղափոխությունից յոթ տարի անց որեւէ մեկը սպանությունների համար պատասխանատվություն չի կրում: Աստված տա, որ սա իրական աշխատանք լինի Մարտի 1-ի սպանությունների վերջնական բացահայտման համար, ոչ թե նախընտրական խաբկանք » ,- նշեց Ալլա Հովհաննիսյանը:
Թագուհի Հակոբյան
