Նոյեմբերի 22-23-ը Մինսկում Հավաքական անվտանգության պայմանագրի կազմակերպության (ՀԱՊԿ) միջոցառումներին չմասնակցելու Երևանի որոշումը չի համապատասխանում հայ ժողովրդի շահերին։
Այս մասին այսօր ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Հայաստանի ղեկավարության որոշումը՝ չմասնակցել վերոնշյալ կառույցների համատեղ նիստին, խոսքը նոյեմբերի 22-ին կայանալիք ԱԳ նախարարների խորհրդի, պաշտպանության նախարարների խորհրդի, անվտանգության խորհուրդների քարտուղարների կոմիտեի ձևաչափերի մասին է, և նոյեմբերի 23-ին ՀԱՊԿ Հավաքական անվտանգության խորհրդի նիստին, իհարկե, ցավալի է:
Մենք չենք հավատում, որ այն համապատասխանում է հայ ժողովրդի երկարաժամկետ շահերին և կնպաստի այս երկրի անվտանգության և կայունության ամրապնդմանը»,- ասել է նա:
Զախարովան միաժամանակ նշել է, որ Հայաստանը մտադիր չէ արգելափակել ՀԱՊԿ կանոնադրական մարմինների աշխատանքը կամ խոչընդոտել արդեն համաձայնեցված փաստաթղթերի հաստատմանը։
«Սա, ըստ էության, Երևանի համար ապագայում աշխատանքին միանալու հնարավորություն է, և մենք հուսով ենք, որ հայ դաշնակիցները մոտ ապագայում կօգտվեն դրանից»,- հավելել է նա։
Ավելի վաղ հայտնի էր դարձել, որ Հայաստանի վարչապետը, արտաքին գործերի և պաշտպանության նախարարության ղեկավարները, ԱԺ նախագահը մտադիր չեն մասնակցել ՀԱՊԿ-ի առաջիկա միջոցառումներին։
