Այրվածքների դեպքում առաջին հերթին հարկավոր է հովացնել վնասված հատվածը, ազատել հագուստից ու սեղմող իրերից և անհապաղ դիմել բժշկի։
Այս մասին կենցաղային պայմաններում այրվածքների ռիսկերի և դրանց դեմ իրականացվող կանխարգելիչ քայլերի թեմայով ասուլիսի ժամանակ ասաց ՀՀ ԱՆ այրվածքաբանության ազգային կենտրոնի տնօրեն Հովհաննես Հովհաննիսյանը:
Հարցին՝ թեթև այրվածքների դեպքում մինչ բժշկին դիմելն առաջին բուժօգնության ի՞նչ կանոններ կան, որոնց մարդիկ կարող են հետևել, Հովհաննիսյանը պատասխանեց՝ առաջին հերթին հարկավոր է փորձել հնարավորինս հեռու մնալ բարձր ջերմաստիճանի աղբյուրից կամ այն գործոնից, որն առաջացրել է այրվածք։
«Երկրորդը ծորակի՝ ոչ սառնարանային ջերմաստիճանի ջրով մաշկի այրված հատվածը լվանալն է։ Երբեք չի կարելի օգտագործել շատ ցածր ջերմաստիճանի ջուր, քանի որ դրանով կխորացվեն սնուցման խնդիրները։ Ոչ մի դեպքում չի կարելի քսել տարբեր քսանյութեր, ձեթ, կենդանական ճարպեր, ձու, ատամի մածուկ, մածուն, թթվասեր և այլն։ Լինում են դեպքեր՝ միջին ծանրության կամ երկրորդ աստիճանի այրվածքներ, որոնք մշակվում են մածունով, և խորացված, ծանր վիճակում դիմում են մեր կենտրոն»,- հավելեց նա։
Հովհաննիսյանի խոսքով՝ այրվածքների դեպքում հարկավոր է նաև հնարավորինս արագ ազատվել հագուստից ու սեղմող իրերից, այդ թվում՝ ժամացույցից ու զարդերից, ինչպես նաև առավելագույնս արագ դիմել շտապօգնության ծառայություն, տեղափոխվել հիվանդանոց ու զերծ մնալ ժողովրդական միջոցներով բուժումներից։
«Ցավոք սրտի, բավականին ակտիվ գործում են տարատեսակ «մասնագետներ», որոնք բուժում են այրվածքներն ու մեծ արդյունքներ են խոստանում, բայց ընդամենը շուրջ վեց ամիս առաջ մենք ականատես եղանք դեպքի, երբ բավական փոքր մակերեսով այրվածքի պարագայում ունեցանք երեխայի մահվան ելքով դեպք նմանատիպ ժողովրդական մեթոդներին դիմելու պատճառով»,- նշեց Հովհաննիսյանը՝ վստահեցնելով, որ անգամ այրվածքներից բացարձակ անտեղյակ բժիշկը շատ ավելի ճիշտ բուժօգնություն կցուցաբերի, քան հեքիմներն ու ժողովրդական մեթոդներով բուժող անձինք։
