Հունիսի 30-ից կսկսեն ձևավորվել Ռուսաստան մտնող ներգաղթյալների անձնական և կենսաչափական տվյալներով թվային պրոֆիլները՝ նրանց կարգավիճակի մոնիթորինգը հեշտացնելու համար: Այս մասին հայտնում է ՏԱՍՍ–ը՝ հղում անելով կառավարության համապատասխան որոշմանը։
Այսպիսով, օտարերկրացիները ցանկացած անցակետով Ռուսաստան մուտք գործելիս պետք է տրամադրեն մատնահետքեր և լուսանկար: Այս տեղեկատվությունը կկազմի թվային պրոֆիլի հիմքը: Օտարերկրացիները կկարողանան ստեղծել թվային պրոֆիլ իրենց ցանկության դեպքում՝ RuID հավելվածում: Սա
օտարերկրացիների համար նախատեսված «Գոսուսլուգի»-ի անալոգն է: Այնտեղ կարելի է հաղորդել Ռուսաստան այցելության և երկրում ծառայություններ ստանալու մասին, օրինակ՝ ստանալ բժշկական ապահովագրություն կամ պայմանավորվել ՆԳՆ-ի հետ։
Թվային պրոֆիլը կունենա եզակի նույնականացուցիչ և ապագայում կարող է փոխարինել թղթային արտոնագրին։Փոփոխությունները չեն վերաբերի Բելառուսի քաղաքացիներին, վեց տարեկանից փոքր երեխաներին, Ռուսաստանում օտարերկրյա պետությունների դիվանագիտական առաքելությունների և հյուպատոսական հիմնարկների դիվանագետներին և աշխատակիցներին, ինչպես նաև նրանց ընտանիքների անդամներին, Ռուսաստանի Դաշնությունում հավատարմագրված միջազգային կազմակերպությունների ու դրանց առաքելությունների աշխատակիցներին և նրանց ընտանիքների անդամներին։
