«Այս պահի դրությամբ ՀՀ-ից դուրս է եկել ու դեռևս Ռուսաստանի Դաշնությունում ձևակերպում չի ստացել մոտ 750 հայկական բեռնատար՝ մի մասը ճանապարհին է, մի մասը՝ Լարսի անցակետում։ Հակառակ ուղղությամբ ևս ունենք 900 բեռնատար»,- այս մասին ասաց Լարսում ՀՀ դեսպանությանը կից մաքսային կցորդ Վահան Հակոբյանը։
Վահան Հակոբյանը նշեց, որ խնդիրը դեռևս լուծում չի ստացել. «Այս պահի դրությամբ բեռնատարների վերադարձները շարունակվում են։ Արդեն մոտ 60-70 վերադարձով բեռնատարներ ունենք խնդիրը առաջանալուց մինչև այս պահը»։
Հարցին, թե արդյոք ընդհանրապես բեռնատար չի՞ անցել Լարսի անցակետը, Հակոբյանը պատասխանեց. «Ինչ-որ բեռներ կան, որ անցել են, բայց հստակ թիվ այս պահին դեռ չունենք։ Սպասում ենք նոր տվյալների»։
Ինչ վերաբերում է այսօր տեղի ունեցած ԵՏՄ նիստին, որում ՀՀ-ն բարձրաձայնել էր խնդիրը, Հակոբյանը ասաց. «Քննարկման արդյունքում որոշվել է, որ «Ռոսսելխոզնադզորը», ռուսական և հայկական ՍԱՏՄ-ները աշխատանքային քննարկումներ կունենան, որի արդյունքում կփորձեն խնդիրը կարգավորել և լուծումներ գտնել։ Այս պահի դրությամբ խնդիրը դեռ կա, բայց գոնե աշխատանքները սկսվել են, և հույս ունեմ, որ շուտով կունենանք արդյունք»։
Դավիթ Լևոնյան
