Ադրբեջանը փորձում է օրակարգ մտցնել ինչ-որ հարցեր, որոնք արհեստականորեն կդժվարացնեն Հայաստանի հետ խաղաղության պայմանագրի կնքումը։
Այս մասին այսօր Ազգային ժողովում լրագրողների հետ զրույցում ասաց ԱԺ նախագահ Ալեն Սիմոնյանը:
«Կարծում եմ՝ Ադրբեջանը փորձում է օրակարգ մտցնել ինչ-որ հարցեր, որոնք արհեստականորեն, միգուցե, կդժվարացնեն խաղաղության պայմանագրի կնքումը: Այն, ինչ-որ մենք փոխանցել ենք, և այն, ինչ-որ մենք բանակցում ենք, մենք էլ լավ գիտենք, իրենք էլ լավ գիտեն ու հիմա անընդհատ դրա մասին խոսելն արհեստական խնդիրներ է առաջացնում։ Ակնհայտ է, որ մենք, իրոք, խոսում ենք խաղաղության մասին, այլ ոչ թե թուղթ ենք ստորագրում կամ ձև ենք անում։ Հիմա, որ վրացիները գալիս են Հայաստան ապրելու, որևիցե խոչընդոտ կա՞ կամ հայերը, որոնք գնում են Վրաստան։ Մենք Վրաստանի հետ պայմանագրի մեջ գրե՞լ ենք դրա մասին։ Իհարկե, չենք գրել», — նշեց Սիմոնյանը։
ԱԺ նախագահի կարծիքով՝ պետք է ինչ-որ ժամանակ անցնի, ադրբեջանական կողմը պետք է նվազեցնի ատելության խոսքը, որը դարձրել են բրենդ․ «Հայաստանին չի կարելի մեղադրել նույնի մեջ, որովհետև Հայաստանում ընդդիմադիր գործիչները և լրագրողները մեզ, հակառակը՝ մեղադրում են Ադրբեջանի ջրաղացին ջուր լցնելու մեջ, հանդուրժող լինելու մեջ։ Պետք է հասկանալի լինի, որ, այո՛, ժամանակ կանցնի և, չեմ բացառում, որ հայերը կգնան Ադրբեջանում կապրեն և ադրբեջանցիները կգան Հայաստանում կապրեն, առևտուր կանեն իրար հետ։ Այո՛, խաղաղության ենք գնում, խաղաղությունը այլ կերպ չի լինում ու այն պնդումները, որ մենք իրար հետ հակամարտել ենք և մեզ համար անլուծելի խնդիր է՝ ինձ համար անընդունելի է, որովհետև պատմությանը հայտնի են բազմաթիվ դեպքեր։ Անգլիան և Ֆրանսիան 116 տարի պատերազմել են և այսօր Անգլիան ու Ֆրանսիան դաշնակիցներ են իրար հետ։ Չեմ ասում, որ վաղը կամ մյուս օրը նման արդյունք կունենքն, բայց նույն տարածաշրջանում ենք ապրում, ունենք նույն խնդրները»։
Ըստ նրա՝ ցանկության դեպքում կարելի է ստորագրել խաղաղության պայմանագիրը 5–10 օրում, քանի որ բավականին աշխատանքներ են տարվել։ Խոսելով Ադրբեջանի նախագահի այն հայտարարությունների մասին, թե առանց պայմանագրի հնաարվոր է խաղաղություն, ինչպես դա արել են ՌԴ–ն և Ճապոնիան, Սիմոնյանը նշեց․ «Շատ վատ օրինակ է բերել, որովհետև այն տարածքային խնդիրը, որ Ճապոնիան ներկայացնում է ՌԴ–ին, մեր ունեցած խնդիր նույնական չեն։ Խաղաղության պայմանագրի համար այսքան գործ ենք արել, եթե Ադրբեջանի նախագահը չհրաժարվի իր քայլերից, փոխի հռետորաբանությունն ու գա հանդիպումներին»։
Անդրադառնալով ռևանշիզմի վախերի մասին ադրբեջանական կողմի հայտարարություններին, վերջինս ընդգծեց․ «Այդ երաշխիքը ինքը պետք է փնտրի իր և իր քաղաքականության մեջ։ Ադրբեջանակն կողմից շատ բան է կախված, չի կարելի կրակել ու սպանել հայ զինվոր և ասել՝ վախենում ենք ռևանշիզմից, ներխուժել ՀՀ տարածք, չգալ խաղաղության պայմանագրի բանակցություններին, աղմուկ հանել ՀՀ–ի համար գնվող զենքերի համար, և ասել՝ ռևանշիզմից վախենում ենք»։
