Արցախի Ազգային ժողովի նախագահ Դավիթ Իշխանյանը հայտարարություն է տարածել Արցախում ստեղծված ներքաղաքական իրավիճակի վերաբերյալ, որն ամբողջությամբ ներկայացնում ենք ստորև․

«Լինելով Արցախի Հանրապետության քաղաքացի և Ազգային ժողովի նախագահ՝ միշտ պայքարել եմ Արցախի Հանրապետության Նախագահի, Ազգային ժողովի և ուժային կառույցների՝ որպես պետականության հիմք ներկայացնող ինստիտուտների կայացման ու հզորացման համար:

Անընդունելի է վերջին օրերին հանրային հարթակներում կեղծ համախմբման կոչերի քողի տակ հանդես եկող որոշ դեմքերի՝ մեր պետականության հիմքերի կազմաքանդմանն ուղղված քայլերը:

Ես Ազգային ժողովի նախագահի պաշտոնը ստանձնել եմ քաղաքական ուժերի համախոհության արդյունքում: Համոզված եմ, որ այդ համախմբումը միս ու արյուն է տալու պետականության պահպանման վեհ գաղափարին, որի լեգիտիմ ներկայացուցիչներն են Նախագահի և Ազգային ժողովի ինստիտուտները:

Բոլոր այն քայլերը, որոնք միտված են սեպ խրելու և ընդհանրապես պետական կառույցների տարանջատմանն ու հակադրությանը, բացառապես թշնամանք են ստեղծում երկրի ներսում և ջուր լցնում թշնամու ջրաղացին:

Վստահ եմ՝ այս ծանր օրերին ուժային և իրավապահպան կառույցների ներկայացուցիչները գիտակցում են պետականության պահպանման գինն ու կարևորությունը ու նրանց վստահված մեր անվտանգությունն ու ներքին անդորրի պահպանումը:

Որպես երկրի քաղաքական ղեկավարությունը ստանձնած երկրորդ դեմք՝ ինչպես ժամանակին մարտի դաշտում անմասն չեմ մնացել պետականության ստեղծման գործընթացին, հավատարիմ և հաստատակամ մնալով մեր նահատակների որդեգրած նպատակներին, գիտակցելով ներքին համերաշխության կարևորությունը, պատրաստ եմ իմ բոլոր ուժերը ներդնել՝ համատեղ որոշումներ կայացնելու և այս իրավիճակից մեր հանրապետությունը նվազագույն վնասներով դուրս բերելու ուղղությամբ:

Որպես օրենսդիր մարմնի ղեկավար, համոզված եմ, որ Արցախի Ազգային ժողովը կստեղծի բոլոր պայմանները՝ դառնալու ոչ միայն քաղաքական քննարկումների, այլև հանրության խնդիրները ներկայացնող և լուծումներ առաջադրող հարթակ:

Վստահեցնում եմ ձեզ, որ Ազգային ժողովը պատրաստ է հյուրընկալել հանրության կառուցողական միտում ունեցող տարբեր շերտերի և պատրաստակամ է լսելու բոլորի կարծիքը և այն ներկայացնելու թե´ Արցախի նախագահին, թե´ պատկան մարմիններին:

Համոզված եղեք, որ այս ծանր կացությունից դուրս կգանք մեր հաստատակամ, արդար, անմնացորդ նվիրվածության ու համերաշխության շնորհիվ։

Կոչ եմ անում բոլորիդ ցուցաբերել զգոնություն և զսպվածություն՝ ի շահ մեր երկրի ու ժողովրդի»,- ասված է հայտարարությունում։

***

Օգոստոսի 17-ին մի շարք աշխարհազորայիններ, որոնք, ըստ տարբեր աղբյուրների, ուղղորդվում էին Արայիկ Հարությունյանի մերձավորների կողմից, մտել էին Ազգային ժողովի շենք՝ նպատակ ունենալով իրենց խնդիրները ներկայացնել ԱԺ պատգամավորներին ու ԱԺ նորընտիր նախագահ Դավիթ Իշխանյանին։ Այդ հանդիպումը, կարծես թե, տեղի չի ունեցել։ Փոխարենը, տվյալ միջադեպից հետո աշխարհազորայինների այդ խմբի հետ հանդիպում է ունեցել Արայիկ Հարությունյանը։

Оգոստոսի 19-ին Ֆեյսբուքի իր էջում տեսաուղերձ է հրապարակել Արցախի նախկին պետական նախարար Ռուբեն Վարդանյանը, որում խիստ քննադատության է ենթարկել Արայիկ Հարությունյանին։ Ըստ Վարդանյանի՝ Հարությունյանը ութ անձի ներկայությամբ ասել է, որ հրաժարական է տալու, որից հետո՝ չորեքշաբթի, տեղի է ունեցել միջադեպ՝ աշխարհազորը ուժով մտել է Ազգային ժողով։

«Ես չգիտեմ՝ դո՞ւք եք ուղեկցել, թե՞ դուք եք հրամայել, թե՞ ձեր տեղակալներն են տեղյակ եղել ու ասել, որ դա անեն։ Միևնույն է, դա անընդունելի է․ դուք քանդում եք պետական ինստիտուտները։ Դուք քանդում եք այն պետությունը, որը, վատ, թե լավ, կառուցել են վերջին 30-35 տարում։ Դուք դրա իրավունքը չունեք»։