Բոլորս էլ հայտնվում ենք այդ իրավիճակում, երբ պետք է անել գործը, բայց ո~նց չես ուզում: Ի՞նչ անել, որ եւ տհաճ չլինի, եւ գործն արվի:
Կան նաեւ մարդիկ, որոնք ուղղակի պաշտում են իրենց աշխատանքը: Նրանք կարող են օրեր անցկացնել թղթերի մեջ, ուշ գիշերին անհրաժեշտ տեղեկատվությունը փնտրել ինտերնետում: Նրանց արժի հիշել, երբ այդքան հոգնեցուցիչ է թվում սեփական աշխատանքը:
Սկզբի համար բավական է, որ գոնե մի դրական բան գտնեք Ձեր աշխատանքի մեջ: Թեկուզ փոքր, բայց հաճելի մի բան: Օրինակ`այդ աշխատանքի արդյունքում թեկուզ անուղղակիորեն զարգանում է հիշողությունը կամ կենտրոնացումը: Ձեր այդ «գյուտը» անպայման արձանագրեք օրագրում:
Փորձեք աշխատանքային օրվա ընթացքում ինքներդ Ձեզ պարգեւել հնարավորինս շատ հաճելի պահեր: Դուրս եկեք թեկուզ հինգ րոպե մաքուր օդ շնչելու, քաղցրավենիք կերեք կամ թերթեք նորաձեւության մասին ամսագրեր: Հավատացե’ք, որ այդպես Դուք իրականում ոչ թե շեղվում եք, այլ ուժ եք հավաքում, եւ աշխատանքն ավելի արագ է առաջ գնում:
Եթե աշխատում եք համակարգչի առաջ կամ ուղղակի նստած, ապա ժամանակին վարժություններ արեք: Հիշե’ք լիցքաթափվելու անհրաժեշտության մասին, եւ ստացե’ք Ձեր բաժին լավ տրամադրությունը:
Անկախ աշխատանքից, հագնվեք գեղեցիկ եւ նորաձեւ: Չէ՞ որ երբ առավոտյան ընտրված հագնվում եք, հարդարում մազերը, շպարվում, տրամադրությունն արդեն ինքնիրեն բարձրանում է: Մնում է միայն այն պահել ողջ օրվա ընթացքում…
Շատ բան մի’ խոստացեք ինքներդ Ձեզ, կենտրոնացեք մի աշխատանքի վրա: Եթե սկսեք մտովի թվարկել բոլոր գործերը, տրամադրությունն արդեն անխուսափելիորեն կընկնի:
Աշխատանքն ավարտելուց հետո պարգեւատրեք Ձեզ, եթե անգամ փոքր բան եք արել, որը հաճելի չէր: Նման դեպքերի համար կոնֆետ պահեք կամ ասենք թավալ տվեք բազմոցին, եթե սիրում եք… Մի խոսքով` հաճելի մի բանով ուրախացրեք Ձեզ: Հավատացեք, որ այդ փոքրիկ պահերն իրականում են կարողանում են «կոտրել» ձանձրույթի, տհաճությունների երկար շղթան:
