Ենթադրում եմ, որ հոկտեմբերի վերջին Բրյուսելում նախապես հայտարարված հանդիպման պատճառն այն է, որ Ադրբեջանի նախագահը չի հաստատել իր մասնակցությունը։ Հոկտեմբերի 25-ին խորհրդարանում այդ մասին հայտարարեց վարչապետ Նիկոլ Փաշինյանը։
«Կան աշխատանքային մանրամասներ, Եվրամիության մեր գործընկերներից կփորձենք պարզաբանումներ ստանալ՝ այդ թվում մի շարք հարցերի վերաբերյալ»,-ասաց Փաշինյանը։
***
Եվրոպական խորհրդի նախագահ Շառլ Միշելը հոկտեմբերի 5-ին Գրանադայում կայացած քառակողմ հանդիպումից հետո լրագրողների հետ ճեպազրույցի ժամանակ հայտարարել էր, որ Հայաստանի և Ադրբեջանի ղեկավարներ Նիկոլ Փաշինյանին և Իլհամ Ալիևին հոկտեմբերի վերջին Բրյուսելում հանդիպման է հրավիրել․ «Մենք հավատում ենք դիվանագիտությանը, հավատում ենք քաղաքական երկխոսությանը, և այդ պատճառով ես երկու առաջնորդներին՝ վարչապետ Փաշինյանին և նախագահ Ալիևին, կհրավիրեմ մինչև հոկտեմբերի վերջ Բրյուսել՝ հանդիպման»։
Հարավային Կովկասի հարցերով ԵՄ հատուկ ներկայացուցիչ Տոյվո Կլաարը հոկտեմբերի 25-ին հայտարարել է, որ Բրյուսելում նախատեսված Հայաստանի և Ադրբեջանի առաջնորդների հանդիպումը տեղի չի ունենա։
Ադրբեջանի նախագահը հրաժարվել էր նաև հոկտեմբերի 5-ին Գրանադայում նախատեսված՝ Եվրոպական քաղաքական համայնքի գագաթաժողովին մասնակցությունից, որի շրջանակում նախատեսված էր հանդիպում վարչապետ Նիկոլ Փաշինյանի հետ։ Հնգակողմ ձևաչափով հանդիպմանը պետք է մասնակցեին Ադրբեջանի, Հայաստանի, Ֆրանսիայի, Գերմանիայի ղեկավարները, ԵՄ Խորհրդի նախագահ Շառլ Միշելը։ Հնգակողմի փոխարեն Գրանադայում տեղի էր ունեցել քառակողմ հանդիպում՝ Փաշինյանի, Մակրոնի, Շոլցի և Միշելի մասնակցությամբ, որի արդյունքներով ընդունվել էր հայտարարություն։
